綱上3d Games

Rifleman The scene is World War II. Help to win the war with individual battles.

Play this free game now!!

新奇、刺激、又好玩！！

永遠懷念The King of POP

Michael Jackson (1958 - 2009)

Der Deutsche Soldaten

一次大戰及現代德軍，一句講哂：「天淵之別」。

Der Untersturmfuehrer im Waffen SS

二戰德國 武裝親衛隊少尉，來自Tristar出品，比例1/35。早兩年前作品，現今post出嚟比各界恥笑吓。

韓戰時期的宣傳單張

韓戰中期，中國大陸介入，調派大量解放軍協助北韓打擊美英為首聯合國部隊。雙方除咗運用一般常規戰術之外，亦利用心理戰術。上面呢兩張宣傳單張就係聯合國部隊印製發比大陸解放軍，叫佢哋：唔好打嘞，快D走啦，我哋(聯合國部隊)裝備好過你哋，共慘黨叫你哋班傻仔去送死咋！結果有班解放軍真係走咗......去聯合國部隊個度投誠，因為佢哋係前國民黨官兵，最後重去埋台灣同老蔣團眾......

真人Figure Show

呢個美佬Marine真型爆，咩住個figure去打仗！真抵死！！

我愛披頭四

寫完John Lennon，心情興奮，不得不寫我的最愛：The Beatles。

其實响七十年代中期，阿爸買咗部六十年代西德出品嘅德律風根唱盤比我播黑膠碟，我一隻The Beatles嘅黑膠碟就係A Hard Day's Night嘅7吋細碟，細碟B面係Things We Said Today。到咗1988年我卒之買到A Hard Day's Night大碟，不過係CD，冇問題！只要有Beatles，我就乜愁都唔見晒！我生於六十年代尾，七八十年代長大，但Beatles歌曲陪我成長，雖然佢地係屬於六十年代。到了今時今日我都要講句"I love you Yeah Yeah Yeah!"

How I Won The War ?

我的最最最愛嘅偶像前Beatles成員主音歌手John Lennon响1967年演出嘅電影 How I Won The War(港譯：戰勝之道)，套片其實係一套反戰嘅電影，John Lennon嘅二戰英軍造型簡直一絕！入型入格！更係啦！John Lennon响1940年生於英國利物浦，雖然响七十代初同老婆Yoko Ono移居美國紐約，到1976年攞埋綠咭變做美國佬。但响我心目中佢係百分百英國人，因為佢着住套Battledress真係好英軍！

充滿政治味道的模型

七十年代意大利Atlantic廠推出嘅模型產品，現今已絕版，皆因Atlantic廠己執笠十多年，就算未執都未必咁明目張膽用D太敏感嘅盒面。現歐洲早已將納粹或法西斯主義定為邪惡主義，更提昇為種族歧視，蘇共已玩完十多年，老毛已入玻璃棺，如果呢四套模型再版，肯定比人吠到肺甩！

(以上內容並不是宣揚有關主義，我個人並不鼓吹有關軍國主義及政治、種族歧視及反宗教的意思)

最愛GTA

好少打機打到上。就係呢隻PSP Game - GTA Vice City Stories令我沉迷。GTA Games充滿暴力，意識不良，尤其上面隻VCS更甚，在虛擬世界內你可以殺人放火、走私、飛車、賣淫、尋仇、打差人、燒車......嘩！唔怪得HMV要貼張紙寫明只賣給十八歲以上人士。吸引我嘅原因除咗內容抵死(故事描述一名多明尼加移民(黑人)Vic Vance本來喺一名軍人，因帶妓女入軍營而被上司革職，由一名無小卒變成Vice City黑社會大佬，好有古惑仔feel！有如一本粗俗英文小說。)主要原因就是呢個Game入面嘅配樂，响Vice City內揸車可以收聽電台，其中一個電台叫Wave103更可以聽番80年代嘅New Wave流行曲！例如The Human League、INXS、Depache Mode、Frankie goes to Hollywood、Berlin、New Order、Roxy Music、The Cure、Japan.......而Pop music更有Phil Collins、Hall & Oates、Laura Branigan等等，Hard Rock 重有Kiss樂隊！最令我開心就喺真真正正聽到10cc嘅經典名作:I'm not in Love，開始上網揾吓有關10cc同埋樂隊成員Eric Stewart資料......

家常小便飯

正所謂：「國以民為重，民以食為天。」食對我嚟講梗喺重要啦。不過經常食街外野，外賣等等都食到食無可食，有時候都要自已落廚煮餐飯餸。要煮餐簡單餸菜十分容易，有時候重好食過街外野！今餐嘅豆角炒肉眼(豬扒肉)同埋香葱炒蛋都令我同女友回味無窮！我煮餸有個秘缺，就係用雞粉代替粗鹽，太鹹對身體唔係太好。「食得未呀？好肚餓呀！」餓到七彩嘅女友同我講。

田宮模型第一盒1/35兵員模型 - 二戰德國戰車兵

孖星模型(田宮模型)，我在中小學時代已經砌唔少，亦都丟唔少(因為砌完就比父母丟咗，原因欠交功課，無心學習，見完家長後的大懲罰。)孖星模型嘅吸引，其實有原因：

1.盒面設計 - 早在六十至七十年代戰爭電影流行，充滿紀律嚴明及英雄式嘅軍人影像十分吸引，孖星兵員模型盒面就用呢個元素，加上响日本十分出名嘅軍事插畫大師大西將美嘅手筆，而製作出充滿電影海報風味嘅盒面出嚟。

2.盒低及盒邊資料詳盡 - 日本人果種一絲不苟精神，可以從盒低及盒邊表露無遺。除咗製作圖示及上色指示之外，亦提供有關歷史簡介，軍服、軍階、勳章、軍用裝備同埋武器都有介紹，而且彩色印刷，即使冇參考書籍亦可以模型盒作為參考資料。真佩服仔嘅包裝藝術同用心。

3.兵員模型配件豐富 - 除咗兵員身體分成三至五件配件之外，身上裝備及槍支都分開出模，當製作時更明白士兵點樣攜帶裝備，想下咩住咁重嘅軍品打仗，重要隨時一命鳴呼，可想而知軍人在戰場上所面對嘅壓力大到你同我都想像唔到。

懷舊模型雅佛士

Airfix(七十年代某中文模型刊物譯為雅佛士)，英國老字號模型廠，早在五六十年代以生產戰機及細比例兵仔為主，到八十年代初結業，幸好在八十年代中期被Humbrol(生產模型油嘅英國公司)收購，繼續生產。到2006年因財政問題被銀行接管，幾乎執笠。我响Airfix Fans Forum見到好多英國Fans知道消息都喊出嚟。好彩到2007年被Hornby收購，又唔死得，Fans喊完又笑，十分戲劇性！我在小學時代第一盒Airfix模型係HO/OO比例(大約1/76)嘅二戰德軍，價錢只售2蚊！

父母親的北韓之行

我阿爸阿媽真巴閉！早兩年前有機會走去封閉保守嘅鐵幕國家：朝鮮民主主義人民共和國旅遊，佢哋去咁耐我驚咁耐，擔心分分鐘比D政府人員溶咗都唔知咩事！爸媽由中國大陸坐車經鴨綠江入境北朝鮮，再到平壤，跟住去到38線嘅板門店休戰區。聽佢哋講當地湖光山色就一般，多數去一D充滿政治色彩嘅景點例如金日成故居，軍事博物館，板門店；晚上更可以欣賞北朝鮮獨有大表演-阿里郎！我問爸媽有冇機會見到金正日，佢地話冇見到(時運高)。如果見到，一定要影相，睇睇金正日條肥佬個頭夠唔夠爆炸，或者係唔係着住對高根鞋周圍走？

Sgt.Johnny On Blog 正式面世！

Sgt.Johnny On Blog 正式面世！又多個平台比我發下謬論，哈哈哈！！